როგორ მოვაწყოთ სამზარეულო როცა სივრცეში შეზღუდული ვართ

პატარა სამზარეულო არ ნიშნავს, რომ კომფორტის, ესთეტიკისა და ფუნქციურობის დათმობა მოგიწევთ. სივრცის შეზღუდვა ხშირად მეტ კრეატიულობას წარმოშობს. პრაქტიკული გადაწყვეტები, მრავალფუნქციური ავეჯი და ჭკვიანურად შერჩეული დეტალები საშუალებას მოგცემთ, მაქსიმალურად გამოიყენოთ ყოველი სანტიმეტრი. დღევანდელ ბლოგში გაგიზიარებთ რჩევებს, რომლებიც დაგეხმარებათ, მცირე სივრცე აქციოთ მყუდრო და სრულფასოვან სამზარეულოდ.

 

სივრცის მოწყობა

სივრცის ეფექტური ათვისება იწყება ზონების სწორი გადანაწილებითა და დაგეგმარებით. სტუდიო ტიპის სივრცე საშუალებას გაძლევთ მისაღები და სამზარეულო გააერთიანოთ. სამზარეულოსთვის შეგიძლიათ მთლიანად ერთი კედელი გამოყოთ. უმჯობესია მისაღები ფანჯრის მხარეს იყოს და სამზარეულო უფრო ბნელ კუთხეში. გამყოფად შეგიძლიათ კუნძული გამოიყენოთ, რომელიც სათავსოს ფუნქციასაც შეითავსებს. ასევე შეგიძლიათ ბარის მაგიდისა და სკამების საშუალებით გაყოთ ეს ორი სივრცე და გამოიყენოთ როგორც საკვების მოსამზადებლად, ისე სავახშმოდ. 

 

მცირე სივრცეში უმჯობესია კედლები მთლიანად აითვისოთ. გამოიყენეთ საკიდი კარადები და თაროები. ამგავარად დაზოგავთ სივრცეს და სასიარულო ადგილიც არ შეგეზღუდებათ.

 

ავეჯის შერჩევა

პატარა ბინაში, სასადილო ზონა ხშირად სხვა ფუნქციებსაც ითავსებს: სამუშაო და სხვადასხვა შეხვედრებისთვის. ამიტომ მნიშ ვნელოვანია ამ ოთახისთვის შესაბამისი სამზარეულოს მაგიდა და სკამების კომპლექტი შეარჩიოთ. კარგი იქნება, თუ მაგიდა საჭიროების შემთხვევაში იშლება. ყოველდღიურობაში დიდ სივრცეს არ დაიკავებს და ფუნქციურადაც გამოგადგებათ, ხოლო თუ მეგობრების მასპინძლობას გადაწყვეტთ, გაშლით და ბევრი ადამიანი დაეტევა. 

 

არჩევის დროს გაითვალისწინეთ, რომ მაგიდა მთლიან სივრცეს არ ფარავდეს. ხოლო სკამები აუცილებლად უნდა ეტეოდეს მაგიდის ქვეშ. სასურველია მინიმალისტური დიზაინის ავეჯის შერჩევა, რადგან ძალიან მარტივია პატარა სივრცის გადატვირთვა. მინიმალისტური დიზაინი კი დაგეხმარებათ სივრცისთვის სიმსუბუქის მინიჭებაში.

 

ფერები და განათება

პატარა სამზარეულოსთვის ფერებისა და განათების სწორად შერჩევა გადამწყვეტი მნიშვნელობისაა. ღია ფერები სივრცეს ვიზუალურად ზრდის და უფრო ჰაეროვან და ნათელ გარემოს ქმნის. სწორად შერჩეული განათება კი ამ ეფექტს კიდევ უფრო აძლიერებს. რეკომენდებულია განათების კომბინაცია: ჭერის ცენტრალური სანათი უზრუნველყოფს ზოგად განათებას, ხოლო სამუშაო ნაწილში განთავსებული ხაზოვანი ან წერტილოვანი შუქი ზრდის ფუნქციურობას და ამცირებს ჩრდილებს. დეკორატიული ან აქცენტური განათება კი სივრცეს სიღრმესა და სტილს მატებს.

 

შეჯამება

მცირე სივრცე ბარიერია, რომელიც კრეატიულობას აღვიძებს. სწორად განაწილებული სივრცე, კარგად შერჩეული ავეჯი და ფერები და შესაბამისი განათება სამზარეულოს მოწყობაში დაგეხმარებათ.